25.04.2008 Qendra “Fëmijët Sot”(QFS), Save the Children dhe organizata fëminore “Zëri 16+” Durrës, zhvilluan sot ne ambientet e shkollës 9-vjeçare publike “14 Nëntori” aktivitetin “Zbatimi i të drejtave të fëmijëve në shkolla” në kuadër të Fushatës Globale “Arsim për të Gjithë”.

Në këtë aktivitet morën pjesë z. Gazmend Oketa deputet i zonës dhe ish-nxënës në shkollën në fjalë, Kryetari i Këshillit të Qarkut Durrës, Drejtori i Drejtorisë Arsimore Rajonale Durrës, përfaqësues nga Bashkia Durrës si dhe rreth 40 nxënes etj. Aktiviteti u zhvillua dhe drejtua nga vete fëmijët e “Zërit 16+” dhe përfaqësuesit e Qeverisë së Nxënësve të shkollës. Fëmijët i bën prezent pjesëmarrësit me problemet me të cilat ndeshen fëmijët në kuadër të zbatimit të të drejtave në shkollat e Durrësit. Këto probleme kane dale nga një pyetësor i zhvilluar nga vete fëmijët e “Zërit 16+”. Studimi në 5 shkolla publike 9-vjeçare nxënësit e shkollave në Durrës pranojnë nder te tjerat ekzistencën e dhunës fizike dhe psikologjike në shkolla kryesisht nga mësuesit. Nxënësit ngritën kërkesat për pasurimin e bibliotekave, zgjerimin e rregullimin e shkollave, ndërtim palestre dhe terreni sportiv në shkollë dhe në lagje, mospagimi për mirëmbajtjen e shkollës etj. Ky aktivitet përkonte me qëllimin i Fushatës Globale në Shqipëri me slogan “Politikanë kthehuni në Shkollë, është koha të kontribuoni", i cili është ndërgjegjësimi i Qeverisë Shqiptare, politikanëve, pushtetit vendor dhe publikut të gjerë për: problemet e arsimimit të fëmijëve në Shqipëri, veçanërisht arsimimit të vajzave dhe fëmijëve të grupeve vulnerabël, fenomenit të braktisjes së shkollës dhe të fëmijëve të përjashtuar nga arsimi si dhe krijimit të kushteve për shkolla sa më miqësore.

Aktiviteti u pasqyrua ne mediat lokale dhe kombëtare, dhe televizioni “News 24” përgatiti një reportazh special për ketë aktivitet.